Allahı tanımağın 5 bərəkəti

 Məsumların (ə) nəzərinə görə, Allahı tanımaq özü ilə 5 bərəkət gətirər.

1. Yaranmışlardan ehtiyacsız olmaq.

Əgər insan həqiqətən Allahı tanıyarsa, hiss edər ki, Allahdan başqasına ehtiyacı olmaz. İmam Əli (ə) buyurur: "O qəlbdə ki, Allah mərifəti yer alar, Allahın xəlqindən ehtiyacsız olmaq da yerini alar”.

2. Dünyaya qarşı laqeyd olmaq.

İnsan Allahı tanıyarsa, axirət həyatına daha çox diqqət edər, dünyaya qarşı laqeyd olar. Allahı tanıyan insan ən çox axirəti üçün çalışıb, səy edər. İmam Əli (ə) buyurur: "Təəccüb edirəm o kəsə ki, Allahı tanıdığını iddia edir, ancaq əbədi axirəti üçün çalışmır”. Məlum olur ki, o kəs ki, axirəti üçün çalışmır, səhərdən axşama qədər ancaq nə qədər qazanacağını düşünər.

Həzrət Peyğəmbər (s) buyurur: "O kəs ki, Allah Təalanı tanıyar, Onu Əzim hesab edər - o, ağzını kəlamdan və qarnını yeməkdən saxlayar və nəfsinə oruc tutaraq, səhər tez duraraq çətinlik verər”.

3. Allah qarşısında təvazökar olmaq.

İmam Əli (ə) buyurur: "O kəs ki, Allahın əzəmətini tanıyır, layiqli deyildir ki, özünü böyük hesab etsin. Həqiqətən, Onun əzəmətini bilənlər üçün ən böyük məqam - Onun qarşısında təvazökar olmaqdır”.

Allahı tanımaq ilə insanın özünü tanıması arasında sıx rabitə vardır. İnsan hər nə qədər Allahın əzəmətini dərk edərsə, özünün nə qədər həqir və kiçik olduğunu başa düşər.

4. İlahi təqdirə razı olar.

İmam Sadiq (ə) buyurur: "Allah Təalaya qarşı ən agah insan o kəsdir ki, hamıdan çox İlahi qəza və qədərə razı olar”.

İnsanların əksər hissəsi İlahi qədərə razı olmaqda çətinlik çəkir. Çünki insanın başına gələn hadisələrin bir çoxu onu təəccübləndirir və dözmək ona çətin gəlir. Zəlzələ, sel, müharibə kimi. Onlarda belə bir sual yaranır ki, Allah bu cür bəlaları niyə nazil etmişdir? Niyə Allah zalımları cəzalandırmır, elə yaxşı insanları aparır? İlahi təqdirə razı olmamaq, Allahı yaxşı tanımamaqdan irəli gəlir. O kəsin ki, incəsənətdən xəbəri yoxdur bir tabloya baxan zaman əgər qara xətlər görərsə, deyər ki, gərək rəssam bu qara xətləri çəkməyəydi. Halbuki rəssam bilir ki, əgər bu xətləri çəkməsəydi tablosu natamam qalardı. Mərifət əhli bu qara xətləri həyatda görməyi bacarır və ona razı olur. Çünki bilir ki, bu qara xətlər həyat tablosunun gözəlliyi üçün zəruridir. İnsan hər nə qədər Allahı çox tanıyarsa, həyatdakı gileyi də azalar.

5. Allah qorxusu.

Allahı tanımağın gətirdiyi bərəkətlərdən biri də Allah qorxusudur. Allah buyurur: "Allahdan Öz bəndələri içərisində ancaq alimlər qorxar”. ("Fatir” 28). Bu elm nəticəsində insan Allahla olan bağını dərk edər. Həzrət Peyğəmbər (s) buyurur: "Hikmət qalası - Allah qorxusudur”. Bu qorxu ancaq əzab qorxusu deyildir. Qorxu bir növ dünyadan kəsilməkdir, insan hiss edir ki, bu dünyada özündən bir şeyi yoxdur. Hər nə varsa, Allahdandır. Əslində bu qorxu - acizlik hissidir. İnsan öz elmi sayəsində dərk edir ki, Allah qarşısında nə qədər ehtiyaclıdır. Bu qorxunun bir qolu - nigaran olmaqdır. Günahkar insan həmişə günahlarının cəzasına görə nigaran olar.

İmam Əli (ə) buyurur: "Allah qorxusundan, Ondan uzaq olmaq nigarançılığına görə ağlamaq - ariflərin ibadətidir”. İmam Əli (ə) bu həqiqətə işarə edir ki, arif Allah qorxusundan və Ondan uzaq olmaq qorxusundan ağlayar. Bu Allah bəndələri özlərini heç bir şeyə malik bilmirlər. Ehtimal verirlər ki, şeytan tərəfindən aldadılmış olarlar. Ona görə də Allahın gözündən düşərlər. Bu zaman qəlblərində nigarançılıq və qorxu yaranar. İnsanın Allah mərifəti hər nə qədər çox olarsa, ardınca daha çox nigarançılıq gətirər.

(Tebyan/ Deyerler.org)