| Main » Files » Əqidə » Əqidə |
Qəbul olmayan tövbələr
| 2013-06-16, 2:39 PM | |
 Qəbul olmayan tövbələr Tövbənin
özünün xüsusi zamanı vardır. Əgər həmin vaxt keçərsə, tövbə qəbul
olunmaz. Hədislərdən oxuyuruq ki, tövbə qapısı o qədər genişdir ki,
bütün günahkarlar ora daxil ola bilirlər, ancaq həmin geniş qapı üç dəfə
onların üzünə bağlanar. 1. Bəla nazil olan zaman edilən tövbə. O
insan ki, bəlaya düçar olmuşdur, əgər o halda tövbə edərsə, tövbəsi
qəbul olmaz. Ona görə Allah buyurur: "Gəmiyə minən (və qərq olmaq
təhlükəsi ilə üzləşən) zaman dini yalnız Allaha məxsus edib Ona dua
edərlər. (İbadət etdikləri bütləri unudarlar. Allah) onları quruya
çıxarıb, xilas edən kimi dərhal ona şərik qoşarlar”. ("Ənkəbut” 65). Bəli,
bu cür duanın və tövbənin təsiri olmaz. Çünki xalis deyildir, bəlkə
məcburiyyət üzündən edilmiş bir tövbədir. O şəxsə bənzəyir ki, şallaq
altında bağışlanma diləyir. Bu bağışlanma şübhəsiz ki, qəbul olmaz. Çünki
bu müşriklər ancaq bəla gələn zamanı Allahı çağırırlar. Elə ki, sahilə
çıxırlar, vahid Allahı yaddan çıxardırlar. Yenidən öz bütlərinə üz
çevirirlər. Xalis tövbə odur ki, onun vasitəsilə həyat tərzi və həyat
gedişatı dəyişər. O tövbə ki, zindan divarları arasında edilər, azadlığa
çıxan zaman yaddan çıxarılar, ya xəstə yatağında edilər və sağalandan
sonra yaddan çıxarılar - qəbul olunmaz. 2. Günahkar insanın ölüm ayağında etdiyi tövbə. O
zaman ki, əcəl gələr və insanın can qapısını döyər, dünyadan getməyinə
yəqinlik əldə edər, bu zaman edilən tövbə qəbul olunmaz. Allah
Təala belə buyurur: "Daim günah edib ölümləri çatan zaman (öləcəyini
yəqin edəndə və ya zahiri hissləri Bərzəx aləminin əlamətlərini dərk
edəndə) «mən indi tövbə etdim» deyənlər və həmçinin küfr halında ölənlər
üçün tövbə yoxdur (onların tövbələri qəbul olunmaz). Ağrılı bir əzab
hazırladığımız kəslər onlardır”. ("Nisa” 18). Bu
cür insanlara Fironu misal çəkmək olar. Belə ki, o, özünü suda batan
halda görəndə deyir: "Nəhayət o, boğulmaq halına gəlib çatanda dedi:
«İsrail övladlarının iman gətirdiyindən başqa bir tanrının olmamasına
iman gətirdim və mən təslim olanlardanam». ("Yunus” 90). Ancaq
onun bu tövbəsi qəbul olmadı. Hədislərdə oxuyuruq ki, Cəbrail (ə)
buyurur: "(Ona deyildi): «İndimi (ki, tövbənin vaxtı keçmişdir)?!
Halbuki, bundan qabaq itaətsizlik etdin və fəsad törədənlərdən idin».
("Yunus” 91). Bu qədər cinayət və əziyyətdən sonra məgər Fironun tövbəsi qəbul olarmı? Ona görə də ölüm ayağında edilən tövbə qəbul olunmaz. 3. İlahi əzabı müşahidə edən zaman tövbə etmək. İnsanların
bir çox İlahi əzabı görən zaman tövbə edirlər. Bu cür tövbənin də
təsiri olmaz. Allah bu haqda buyurur: "Bizim əzabımızı görəndə dedilər:
«Tək olan Allaha iman gətirdik və (Allaha) qoşduğumuz şəriklərə kafir
olduq». Lakin əzabımızı gördükləri zaman imanlarının onlara xeyir
verməsi mümkün deyildi. (Bu,) Allahın (qədim zamanlardan) bəndələri
barəsində (həyata) keçmiş qanunudur. Kafirlər orada ziyana uğradılar”.
("Ğafir” 84-85). Bəli, İlahi əzab görən
zaman da tövbə qəbul olunmaz. Həzrət Nuhun (ə) qövmü tufanı görəndə,
Həzrət Lutun (ə) qövmü göydən daş yağan zaman və eləcə də başqa əzablar
zamanı edilən tövbə qəbul olmaz. Ölüm
xəbər verməz. Ölüm hər an gələ bilər. Hər bir insan hər bir dəqiqə və ya
saniyə ölüm ayağında olmaq təhlükəsindəyik. Ona görə də insan hər zaman
Allahı xatırlamalı və həqiqi tövbə etməlidir. Məbada tövbə qapıları
üzümüzə bağlansın və bir daha bu qapını açmaq mümkün olmasın. Tövbə
millət və ya irq tanımır. Bu, bir İlahi sünnətdir və hamıya aiddir. (Tebyan/ Deyerler.org) | |
| Views: 847 | Downloads: 0 | Rating: 0.0/0 | |
| Total comments: 0 | |
