Biz (Quranı) qədr gecəsində nazil etdik.

Qədr gecəsi nur, rəhmət, Quranın nazil olduğu, səadət, xeyirlərin və bərəkətlərin nazil olduğu gecədir. Bu gecə bəşər həyatının yeni başlanğıcı, dəyişiklik mənbəyi və insanlığın kamil olmasıdır.
Əgər bu gecə olmasaydı və gəlməsəydi, insanın bədbəxt qaranlıq gecələri sona çatmayacaq, xoşbəxt səhər açılmayacaqdı, əsarətdən və müstəmləkədən azad olmayacaqdı.
Qədr gecəsi bəşəriyyətin azadlıq və insanın hüququnun elan olunduğu və ədalət hökumətinin bünövrəsinin qoyulduğu gecədir.
Bu gecədə qəflətdə olan, fəsadlaşmış, çirkinliklər içərisində azmış millətlər üçün hidayət və oyanış üçün ən böyük və dəyərli səmavi kitab nazil olmuşdur ki, əbədiyyətə qədər bəşəriyyətin səadətinə zaminidir. Bu kitab dünyanı şirk zülmətindən, bütpərəstlik, üçlük, yəhudiyyət xurafatından və s. aydın tovhidə və yeganə Allaha ibadətə yol göstərdi. 
Bəli, Quran batil düşüncələri alt-üst edərək, insan şəxsiyyətini möhtərəm hesab etdi. Bu gecədə bəşəriyyətin hüququ elan edilmiş, şəxsiyyətə pərəstişi və şəxsi qüvvələr məhkum edilmiş, hakim heyyətin cah- cəlalını, imtiyazlarını və israfçılığı məhdudlaşdırılmış və beytul malın oğurlanmasını və talan edilməsi dayandırılmış və hamı üçün bərabər hüquqluluq yaradılmışdır..
Belə aydınlaşır ki, qədr gecəsi dəyərli fürsətlərdəndir. Deməli, biz bu gecədə İslamın bugünki vəziyyəti barəsində düşünməli və Quran təlimlərinə daha çox diqqət yetirməli və onu qənimət hesab etməliyik. Quran və onun əhkamı ilə əlaqələrimizi tamamilə gözdən keçirməliyik. Bu mübarək gecədə ibadət və dua oxumaqla, oyaq qalaq və bu gecənin fəzilətlərindən istifadə edək. Qədr gecəsində hər kəs Allahın evinə getməlidirlər ki, orada olmağın səadətindən və Allaha yaxınlaşma ləzzətinə nail olsunlar.
Quran qədr gecəsini " mübarək gecə” adlandırmış və onun şəninə bir surə nazil olmuş və bu gecənin şərəfi min aydan çox olması bildirilmişdir.

Qədr gecəsinin təyini

Qədr gecəsinin təyinində mübahisə olmağına baxmayaraq, mötəbər rəvayətlərdən əldə edilmişdir ki, Qədr gecəsi - ramazan ayınmın " on doqquzuncu”, " iyirmi birinci” və " iyirmi üçüncü” gecələrindən xaric deyil. Daha etibarlı mənbələrə əsasən qədr gecəsi " iyirmi üçüncü” gecəyə təsadüf edir. Digər xəbərlərə əsasən isə qədr gecəsi bu üç gecədən biridir.

Qədr gecəsinin gizli olması hikməti

Yəqinliklə onu qeyd etmək olar ki, qədr gecəsi məlum deyil. Bu gecənin gizli qalması hikmətli və məsləhətli olmuşdur. Bu ondan ibarətdir ki, bu gecələrdə müsəlmanlar daha çox ibadət edərək Quran, dualar oxuyub, islam maarif, təlim və hüquqlarını öyrənsinlər. Müsəlmanlar bu " On doqquzuncu”, " iyirmi birinci” və " iyirmi üçüncü” gecələrdə tövbə, istiğfar, əməllərin islahına və Quranın, duaların oxunuşuna ciddi yanaşsınlar və sübhə qədər oyaq qalsınlar. 
Bu gecənin gizli olmasının səbəblərindən biri də belə nəticəyə gəlmək olar ki, bu gecə bu uca məqamla bilinsəydi, bir çox insanlar yalnız bu gecəylə kifayətlənəcəkdilər və digər gecələrdə duaların feyzindən məhrum olacaqdılar. Bir çoxları bu bir gecədə ibadət etməkləri ilə qürurlanacaqdılar. Bu gecə naməlum və gizli olduğundan, möminlər ehtimal olunan gecələrdə Allahı zikr, tövbə və istiğfar edirlər və daha çox savab əldə edirlər və bunun nəticəsində onların fəzilətləri daha da artır. 
Allah ibadətlərinizi qəbul etsin!

Pərviz Piriyev

haqyolu.org