"İnsan həyatın hər sahəsində ifrat və təfrit çərçivəsində,
yəni mötədil şəkildə yaşamalıdır"
İnternetin insanlara verdiyi imkanların artımı ictimai və şəxsi münasibətlər
baxımdan yaşanan proseslərdən də yan keçmir.
Cəmiyyətdə qadın-kişi münasibətləri muasir dövrdə artıq virtual müstəvidə də
genişlənməkdədir.
İslamazeri.az İnternet Qəzeti mövzu ilə bağlı ictimai, dini sferada fəaliyyət
göstərən şəxslərin münasibətini öyrənib.
Dəyanət Rzayev - psixoloq:
"ABŞ-da və Avropada insanlar evli ola-ola xəyanət etmirlər. Amma Azərbaycanda
bu çox yayılıb. Sosial şəbəkələr və digər vasitələrlə daha da artıb. Bu cür
hallar o fəsadları yarada bilər ki, ölüm ola bilər, qısqanclıq zəmnində kiməsə
xəsarət yetirilə bilər. Azərbaycanda bu cür hallar iki cür nəticələnir. Normal
insan gedir boşanır, qeyri-normal isə vurub öldürür. Amma son zamanlar
qısqanclıq zəmnində olan qətllərin çoxu öz əksini tapmır. Cəmiyyətimizdə
aqressiv insanlar çoxdur. Kimsə sosial şəbəkədə, ya da digər yerdə tanış olub həyat
yoldaşını aldadır, digəri isə daha da aqresivləşir və sonda faciə olur. Sosial
şəbəkələrdəki bu cür hallar evlənməməyə gətirib çıxara bilər, çünki bu cür
halları görən insanlar evlilikdən qaçırlar.”
Mircəfər Əyyubzadə - ilahiyyatçı:
"Bismillahirrəhmanirrəhim. Bunu ümumi götürmək daha yaxşı olar.
Qadınların kişilərlə qarışması, kişilərin qadınlarla qarışması getdikcə həyanı
aradan aparır. İnsanları biraz da həyasızlaşdırır. Biri var cəmiyyətdə günah
işlər çox ola, amma gizlində ola, bunun ictimai təsiri çox da güclü olmaz. Fəqət
bir cəmiyyətdə günah az olsa, amma yaylmış olsa, yəni insanlar onu günah kimi qəbul
etməsələr, utanmasalar o cəmiyyətin düzəlməsi daha çətin olar. Qarşısını almaq
üçün birinci növbədə maarifləndirmək lazımdır. Bu sahədə mömin və möminələr
böyük misiyaya malikdirlər. Mümkün qədər çalışıb, yeni nəsli daha da düzgün
maarifləndirmək lazımdır. Qadınlar ictimaiyyətdən kənarda qalmasın deyə onları
işə dəvət etmək, təşkilata və tədbirlərə dəvət etmək çox gözəldir. Amma bunlar
hər istənil sahəyə aid deyil. Yəni əgər bəzi işlər qadınların həyasını aradan
aparmağa doğru aparırsa, təbii ki bundan çəkinmək lazımdır. Mümkün qədər
hicaba, həyaya diqqət etmək lazımdır. Söhbət təkcə zahiri deyil, həm də mənəvi,
yəni ruhun hicabından gedir. Bu həm kişiyə və həm də qadınlara aiddir. Heç bir
hal biz kişilərə haqq vermir ki, şəriətin qanunlarını pozaq, qadınları hansısa
işlərdə əşyaya, vasitəyə çevirək, onlardan istifadə edək və bununla da hörmətsiz
hala salaq."
Səidə Səmədova - MMDİB Nərgiz QC-nin icraçı direktoru:
"Ümumiyyətlə insan həyatın hər sahəsində ifrat və təfrit çərçivəsində
yaşamalıdır. Yəni bütün yaşamını mötədil şəkildə tənzimləməlidir. Hər bir zərərdən
qorunmaq üçün sədlər olmalıdır. Cəmiyyətdə nizamlanmalı olan məsələlərdən biri
də qadın-kişi münasibətləridir.
Mən həm bir qadın olaraq, həm də "Nərgiz” Qadınlar Cəmiyyətinin rəsmisi olaraq ələlxüsus
xanımlar barədə fikir bildirmək istəyirəm. Çünki zərif cinsin nümayəndəsi
olaraq, fitrətində həssas heysiyyat qoyulmuş olan xanımlar özlərinə qarşı səviyyəli
münasibəti, hörməti təmin etmək üçün ilk növbədə özləri bu hala diqqət yetirməlidirlər.
Həm zahiri, həm də daxili ismət baxımından. Zahiri baxımdan cəmiyyət arasında
qapalı geyimin, qarşı cinsdən diqqət çəkməyən geyimin böyük əhəmiyyəti var.
Lakin bu məsələnin bir tərəfidir. Digər tərəfi isə həmin xanımın danışığı,
davranışı, yaxın qohumu olmayan insanlarla səmimiyyət həddidir.
Yəni ona qarşı mümkün ola biləcək zərərlərdən qorumaq üçün qadının təkcə zahiri
görünüşünün lazımi şəkildə olması kifayət etmir. Çünki muasir dövrdə artıq
keçmişdə olmayan yeni virtual ictimai sfera, sosial şəbəkələr mövcuddur. Burada
əsasən ikinci cəhət, yəni daxili, mənəvi cəhət rol oynayır. Belə ki, ünsiyyət
zamanı hədsiz səmimiyyət qarşılıqlı hörmət şəraitinin də aradan getməsinə səbəb
olur. Bundan sonra qeyri-sağlam ünsiyyətlərlərin, daha sonra isə lazımsız
söz-söhbətlərin, təəssüf ki, hətta faciələrə aparan fəsadların meydana gəlməsi
üçün şərait formalaşır.
Belə mənfi tendensiyaların olması etik normaların, əxlaqi dəyərlərin, dini
maariflənmənin olmadığı cəmiyyətdə daha realdır. Lakin hər iki tərəf, yəni həm
qadın, həm kişi sözügedən mövzuda yetərincə bilgili olsa və bildiyinə də əməl
etsə, əlbətdə ki, cəmiyyət daha sağlam, səviyyəli qarşılıqlı münasibətlər şəraitində
təşəkkül tapar.”
Seyid Elman Ağazadə - ilahiyyatçı:
"Bismillahirrəhmanirrəhim. Hal-hazırda sosioloqların ən çox narahat olduqları,
üzərində durduqları, həyəcan təbili çaldıqları məsələlərdən biri də sosial şəbəkə
bəlasıdır.
Hər gün görürük ki, "facebook” evlənməlləri və boşanmaları mətbuat səhifələrini
tutub. Ümumiyyətlə internet hələ dünyada yayılmağa başladığı ilkin vaxtlarda
virtual tanışlıqlar barədə İslam alimləri valideynlərə və gənclərə xəbərdarlıq
etmiş, bu barədə islami baxışı diqqətə çatdırmış, mənəviyyatın qorunması üçün bəzi
məsləhətlər vermişdilər. O vaxt hələ "facebok”, "tvitter” kimi sosial şəbəkələr
yox idi, ancaq "hotmail” və "yahoo mesencer” artıq yayılmaqdaydı. Təəssüflər
olsun ki, cəmiyyətdə bu məsələyə lazımi qədər diqqət olunmadı və hazırda bu
bropblem dərinləşməyə doğru getməkdədir.
İslam dini kişi və qadın, islami terminlərlə desək məhrəm-naməhrəm münasibətlərinə
diqqətlə yanaşır. Bu barədə Qurani-Kərimdə qadının naz-qəmzəli səsinin, həmçinin
hətta ayaq səslərinin belə kişiləri azdıran fəsadları meydana gətirə biləcəyinə
dair ayələr mövcuddur.
Dini ktablarda şeytanın öz etirafına əsasən ən çox tələ qurduğu məsələ 2 naməhrəmin
bir-biri ilə rabitə qurmasıdır. Sosial şəbəkələrdə ilk addım sadəcə tanışlıq
olsa da, sonradan diqqət edilməzsə, bu tanışlıq dostluğa və başqa daha səmimi,
sərhədsiz münasibətlərə sirayət edir. Əlbətdə, biz insanlar nöqsanlı, günah
ehtimalı olan bəndələrik. Ona görə də dini tövsiyyə budur ki, insan tez-tez
özünütənqidlə şəxsi ruhi vəziyyətini hesaba çəksin, qəflətə düşməməkçün
arxayınçılığa qapılmadan öz gündəlik davranışını süzgəcdən keçirsin. Belə olan
halda uçuruma aparan ilk addımdan etibarən nə qədər ki gec deyil özünə mənəvi
bir çəki-düzən versin. Çünki sonrakı mərhələdə ayrılmaq çətin olur. Ona görə də
munasibət artıq necə deyərlər o incə çalarlara keçəndə tez dayandırılmalıdır.
Valideynlərin də üzərinə bu məsələdə məsuliyyət düşür. Onlar uşaqlarını hələ
kiçik yaşlardan bu barədə maarifləndirməli, internetin zərərli cəhətlərindən çəkindirməlidirlər.
Cəmiyyəti düşünən hər bir kəs də bu barədə maariflənmə aparmalıdır.”
Əbülfəz Bünyadov - jurnalist, yazıçı:
"Qadın-kişi münasibətləri həmişə həssaslıq daşıyan mövzulardandır. Heç təsadüfü
deyil ki, kiçik yaşlardan bacı-qardaşın yataq otaqlarını belə ayırmalarını təkid
edən din burada təhlükənin səviyyəsini hər kəsə anlatmaqla bu işə diqqət yönətməkdədir.
Bu məsələ diqqətlə araşdırıldıqda təhlükə heç də uzaq deyill. Məhz bu səbəbə
görədir ki, dövrün təqlid olunan müctəhidləri istisnasız zərurət həddindən
artıq naməhrəm qadın-kişi münasibətltini haram bilir. Təcrübə də gösrərir ki,
dağılan ailələr, kökündə xəyanət gizlənən ölüm faktorlarının əksəriyyəti sosial
şəbəkələrdən başlayan münasibətlərdən doğur. Buna Azərbaycan kimi dini mənəviyyatı
istismar olunaraq insanları cinsi ehtirasa çağıran bir ölkənin əksər mediasını əlavə
etsək, mənzərə bizə aydın olar. Dini bilgi insanı günahdan qoruyan mexanizm
olduğu kimi, əksi də ehtirasa çağıran amildır. Buna görə də təbii olaraq sosial
şəbəkədə naməhrəm şəxslərin sonu heç şübhəsiz fəsad səbəb olacaq münasibətləri
bəyənilməyən haldır və dini terminlə desək haram münasibətlər olduğundan yol
verilən hal deyil.”
Hacı Nuhbala Rəhimov- ilahiyyatçı:
"Qurani-Kərimdə qadın və kişinin münasibətləri haqqında Allah hədd qoyub.
Hər bir qadın və hər bir kişi əgər bu həddə əməl etməsə, bizim ağılımızın dərk
etdiyi və dərk etmədiyi fəsadlar ortaya çıxa bilər. O fəsadlardan biri də
insani müqəddəsatın aradan getməyidir ki, biz bu gün cəmiyyətdə bunun şahidi
oluruq. İnsani müqəddəsat ləyaqətdən, iffətdən, ismətdən, həyadan və qarşılıqlı
səmimi münasibətlərdən ibarətdir. Nə qədər ki, qadın kişi münasibətləri
Qurani-Kərimin buyurduğu hədd çərçivəsində cəmiyyətdə sabit təqdim olunmayıb,
bu cür fəsadlar ardıcıl olaraq baş verir. Biz bunun şahidi oluruq. Arzumuz və əlimizdən
gələn odur ki, hicab deyiləndə təkcə baş bağlamaq, insanın mənəviyyatının
qeyri-mənəvi dəyərlərdən qorunması nəzərdə tutulmur. Hicablı xanım naməhrəm
kişi ilə elə söhbət etməməlidir ki, onda hər hansı cəsarət tapılsın ki,
qeyri-ciddi bir şey barədə münasibət qurmaq hissi yaransın. İnsan gərək həyasın
qorusun. Əks halda cəmiyyət bunun acı nəticəsin görəcək və hal hazırdada görməkdədir."
Hacı Mirfəyyaz Fəttayev- ilahiyyatçı:
"Bu cür hallar ruha mənfi təsir qoyar. Eyni zamandada şəhvəti artıraraq zinaya
yol açar. Şəriət bu cür münasibətləri haram olduğunu bildirir. Haram da ruha, mənəviyyata
ciddi zərbə vurur. Eyni zamanda haram insanları rəzilliyə doğru aparır. İnsanı
mənəvi ləzzətlərdən, Allah zikrindən uzaqlaşdıraraq nəfsi istəklərə tərəf
aparır. Bu cür hallar ancaq zinaya yol açmaqdan başqa heç nəyə xidmət etmir. Və
bütün bunlar nəticə etibarilə ictimai quruluşu tənəzzülə sürükləyir.”